一樽蒸餾水，令人嘗盡人情冷暖。CasperCheung是嬌滴滴OL，公司除了老闆及一名文員兩個男人外，其他通通是全女班。Casper對一眾女同事及兩個男人的縮骨行徑越來越看不過眼，所為何事？就是人人藉故不更換重甸甸的蒸餾水樽，令她非常勞氣。
「樽水就快冇就唔飲住」
Casper指同事為了省下換水樽氣力，便使出種種小動作，「每朝早返工，睇見樽水就快冇就唔飲住，等到有人換水，先仆出去飲！」另一同事近日更聲言，由於中醫要她戒口，不能飲蒸餾水，她自己帶水飲用，「呢招勁呀，以後大安旨意唔使換水。」她又指有些同事行徑卑劣，「有時叫啲賤人幫手搬水，點知對方表面上係一齊搬，實際上冇用到力，我試過差啲整親隻手同埋腰，好想喊。」
她說現時每星期要搬起水樽換三次水，覺得越來越「唔抵」，「大家都有份飲，點解要我搬？」她說現時為求自保，「一於敵不動我不動，如果冇人願意搬水，咪大家唔好飲囉，為咗一樽水，令到大家面和心不和。」由於這個人人懶郁手的原因，她說現在變成由老闆換水，「我發覺佢好有風度。」