陳沛嘉、余安安同李詩韻噚日喺中環出席美容品牌LaPrairie新店嘅開幕活動，擔任剪綵嘉賓嘅陳沛嘉着上超低胸透視晚裝裙，成為全場焦點。
「造新聞我唔識」
曾同陳沛嘉傳不和嘅陳嘉容日前自爆婚姻亮紅燈，陳沛嘉噚日暗寸對方自製新聞，佢話：「欣賞佢敢愛敢恨，離婚好可惜，不過係咪真就要下回分解先知。任何人利用media去做個人宣傳都唔好，artist就應該拍好自己嘅戲，model就做好自己嘅show，相信Eunice（陳嘉容）唔需要咁做（指自製新聞），佢係行內一姐，造新聞我就唔係好識啦！」
至於余安安就話佢18歲嘅大女稍後放暑假會返香港，佢話：「大女𠵱家讀law，之前都安排過佢去Dior做兼職，今年佢會去一本外國雜誌度返工，佢本身都好鍾意寫嘢。細女今年16歲，都話想試吓做暑期工。」
此外，陳嘉容噚晚有份去銅鑼灣行騷，之前佢冇嚟綵排，到夜晚7點幾由LisaS.同Rosemary等人陪住佢入場，佢一直保持笑容，但就冇回應婚變件事。
