幾個主要聯賽收晒「咧」，得番啲睇都未睇過嘅賽事玩；加上今周又係國際賽賽期，戶口唔使擺咁多貨喺度嘞，亂槍掃射，到頭來中唔到目標又嘥彈藥，係要打嘅，一係就打隻大野豬返嚟，攻下啲大彩池好過啦。
個別彩池設特別多寶
𠵱家足智彩嘅「6寶半全場」同「孖寶半全膽」，越開越多，以往每個比較多受注比賽嘅日子，最多只有一口，𠵱家單日有兩口都係等閒事。可能會諗，呢種唔計賠率、淨係睇彩池受注金額有幾多而作出派彩嘅玩法，開多幾口咪盞分薄晒單一彩池金額？好在馬會都會為個別彩池設立幾十萬嘅多寶獎金，個派彩都算有啲保證嘅。
由於呢個「6寶半全場」彩池，唔係計賠率去派彩，就算畀你度中條場場都係幾十倍嘅「主客」或者「客主」出嚟，中埋，就唔值得恭喜嘞，分分鐘個派彩同你自己用呢幾場冷嘢串過關，好似水瓜打狗咁唔見一截。所以呢，多啲向熱門嗰隊半、全場俱贏嘅熱門選擇，好似「主主」、「客客」呢啲埋手，就算多人中都化算吖，使乜諗爆頭向啲唔切實際嘅超冷門選項埋手！有呢啲心水，留番嚟玩單頭或過兩、三關都好夠啦。
好似呢個周末，兩口「6寶半全場」，當中大部份賽事，都係新開設受注、港人唔算太熟悉嘅美職聯組成，完全唔知點捉路，小注博啲熱門選擇，已經係最好出擊策略。 文：華度