嚟緊嘅星期六係國際賽日，我青蛙仔左諗右諗，揀咗澳洲主場對烏拉圭呢場友賽。「烏圭」喺06世盃外圍賽附加賽俾袋鼠兵踢出局，一直等機會復仇，呢次強陣出征冇咗好多件主力嘅袋鼠兵，真係有得贏；「讓球」開出平手盤，要硬高水嘅「烏圭」。青蛙仔
澳洲教練阿諾喺06年世界盃決賽周後，頂咗軒廸克個位，但一直只係做臨時工，啱啱先轉做長工。佢都好醒，即刻打親民牌，噚日邀請球迷入場睇晏晝四點半（澳洲時間）課操練，希望佢哋對隊波了解多啲，等今晚可以落力啲打氣。
呢場波袋鼠兵有天時地利人和，但嗰陣就唔係好掂，班主力好似舒華沙、基維爾、卡希爾、比斯安奴、艾萊斯同埋維度卡咁，唔係受傷就係休戰，雖則仲有比奧甘、尼爾、艾馬頓同居連拿等喺頂級聯賽效力嘅球員撐場，不過班波嘅戰力就弱晒。
袋鼠兵教練功力弱
再睇戰績，澳洲喺世盃後打咗7場比賽，攞到3勝2和2負，其中包括作客輸俾弱隊科威特0:2。查實佢哋喺人腳上冇乜大分別，但阿諾無論喺排陣、調兵遣將抑或臨場應變，都同前教練軒廸克有好大距離。我青蛙仔聽過好多人講，之前嗰年捧袋鼠兵，全因為佢哋有個軒廸克，𠵱家換咗阿諾，再冇捧場價值。
烏拉圭前年11月喺世盃外圍賽附加賽，互射12碼以2:4輸畀澳洲，搞到入唔到決賽周，所謂「仇人見面，份外眼紅」，呢場就算係友賽相信亦會打真軍，務求報番一箭之仇。睇番「烏圭」嗰陣，喺歐洲頂級聯賽搵食嘅韋亞拉、洛廸古斯、加布加西亞、艾斯杜恩諾夫、列高巴同科蘭等，通通喺度，睇嚟真係好認真。呢場波開出平手盤，要「烏圭」W。
德國數4、5球唔難
另一場心水，梗係我愛隊德國啦！冇錯德國係冇好多件主力，好似係費特列治、保路斯基、波歷克同埋普多斯基咁，但實力都仲係比聖馬力諾高幾班。
首循環佢哋作客聖馬力諾贏13:0，呢場就算打個五折，都贏到6粒啦。呢場波「主其他」波膽熱爆，得1.55倍，完全冇肉食，所以我就寧願要4:0同5:0，至少有7倍同6倍。
投資特攻隊金句
「我青蛙仔聽過好多人講，之前嗰年捧袋鼠兵，全因為佢哋有個軒廸克，𠵱家換咗阿諾，再冇捧場價值。」
熱選大藍籌
星期六1
讓球
烏拉圭（平手盤）
評語：烏拉圭強陣，而且要報仇，今次喺友賽作客冇咗半隊主力嘅澳洲，應該有得贏。
冷選23線股
星期六10
波膽
德國勝5:0（6倍）
評語：德國冇咗好幾名主力實力確係受損，但質素仍高過聖馬力諾好多，贏4、5粒冇問題。