南韓主場一向有個勢，頂級球隊去到佢哋地頭，都唔係話咁容易贏得到波，尤其係友賽，頂級球隊成員個個身嬌肉貴，真係使乜同你搏咗條老命？贏唔到，唔使輸住離場都願啦。周末南韓迎戰荷蘭嘅友賽，荷蘭嗰邊雖然有聲氣話，被棄用多時嘅箭頭人物雲尼斯達萊，願意再次代表國家隊上陣，但呢場仲未有份，相信兩隊都難逃踢成1:1平手嘅戰果。
巴拉圭可小勝奧國
歐洲國家盃外圍賽呢個禮拜亦繼續喺各地起烽火，唔使踢外圍賽直接晉身決賽周嘅主辦國之一奧地利，亦繼續利用呢個國際賽期，搵其他球隊「拍跳」，等班兵唔好唞懶個身。不過，奧地利嘅實力可能仲係同一線及二線球隊有啲距離，佢哋嘅熱身友賽成績認真麻麻，剛啱禮拜三晚，又喺主場輸埋畀蘇格蘭0:1；周六迎戰另一更強腳色巴拉圭，照計都難有運行，再博客隊贏1:0。
繼續講友賽，芸芸球隊當中，美國都可算係其中一支就算踢友賽都甚少揸流攤嘅球隊，禮拜日朝早迎戰中國隊，照睇牌面實力，真係好難唔秤高美國多少，呢場波美國可望又見佢哋嘅2:0熱門贏波波膽。 文：華度
波膽過關3串7
星期六2 南韓和1:1 7倍
星期六6 巴拉圭勝1:0 8倍
星期六32 美國勝2:0 5倍
全中賠率 431倍