今年8月約滿離任嘅金管局副總裁韋柏康，最新動向居然同近年「韓流襲港」嘅首爾扯上關係，噚日《道瓊斯》通訊社引述當地報章嚟自南韓金融監管服務局（FSS）一名官員嘅消息話，該局將會聘請一位嚟自香港金管局嘅高層，出任FSS副行長一職；又話聘請韋翁嘅進度，已去到斟具體細節階段。
華華當然第一時間向金管局查詢，發言人代轉述韋翁回覆，話唔會評論。曾經喺美國聯儲局任職高級助理總裁嘅韋柏康，最耍家當然係對國際銀行監管條例，以及多邊地區金融關係嘅認識，好似巴塞爾新資本協定呢啲艱澀課題，就係佢老哥嘅專長。
外界估計，若果單料屬實，FSS羅致韋翁，相信同當地要提升國際監管標準，令首爾變做更具國際化嘅金融商務中心目標相符。不過，一名老外對保守嘅大韓體制，能改變多少，要拭目以待嘞。