任達華與名模琦琦有女萬事足，兩夫婦自從愛女任晴佳出世後，琦琦負責家頭細務，華仔則主力賺錢養妻活女，他近日更換了一部平治座駕代步。這個廿四孝爸爸為博女兒一笑，車廂內還特別安裝迷你電視，以便囡囡可以隨時睇卡通片，認真體貼。
任達華與琦琦自從05年榮升父母，誕下愛女任晴佳（Ella）後，一家三口生活愉快，琦琦大部份時間都會陪伴囡囡，只抽取小部份時間繼續模特兒工作，而華仔則全力賺錢養家，以給妻女最好的生活。
賣掉舊四驅車
華仔近日把LandRover四驅車賣掉，換了一部平治S500L豪華房車，他日前便駕駛這部座駕在尖沙嘴接受訪問。華仔表示因為寶貝女Ella只得兩歲多，乘坐四驅車始終不夠舒服，他這個廿四孝老竇故此在年初特別花錢換車，以便閒時可做柴可夫接載女兒遊車河，共享親子之樂。
華仔的座駕安裝了一部迷你電視，他直認這是為Ella而設，他說：「平時我開工，琦琦同Ella多數由司機接送，佢哋坐開保母車，嗰架車係有電視仔嘅，Ella一上車就話要睇卡通片，我為咗吸引佢都坐吓我架車，梗係都要有呢啲服務，唔係阿囡淨係識搵Frankie叔叔（司機）唔搵爹哋，我會呷醋㗎。」
捱眼瞓陪囡囡
華仔的平治雖是二手車，但內外仍非常簇新，提到該車的售價，他說：「好平啫，我拍個內地廣告就賺番，為咗個女冇計啦。」以華仔的內地廣告身價，這部座駕相信也應近百萬。
近年忙於拍攝電影的華仔，由於工作時間日夜顛倒，每星期跟囡囡見面時間不多，但他有時寧可犧牲睡眠時間也要陪乖乖女，華仔說：「有時我通宵拍完戲返到屋企，寧願唔瞓住都陪個女食埋早餐，然後佢返學，我就返房休息，總之見到個女，我乜嘢攰都會唔記得晒。」
採訪：比華利 攝影：林德雄
