自從無綫劇集《溏心風暴》播出後，關菊英飾演的細契一角令觀眾恨之入骨，網上更有人對她喊打喊殺，關菊英聽後不怒反笑，她說：「𠵱家啲fans好聰明，我都有上網睇佢哋鬧我，佢哋係憎細契呢個角色，但係就鍾意關菊英演得好，仲叫我加油。其實當初接呢套劇係監製同我講話有得發揮，我都冇諗過會有咁大迴響，初初我都擔心會破壞自己歌手形象，但做戲始終係做戲，而且我都想挑戰吓自己。」
一念之差走歪路
關菊英表示劇中的角色雖奸險，但不失道理，她說：「我覺得呢個角色都係一個悲劇，佢本身都好可憐，細個屋企冇錢，搵朝唔得晚，犧牲自己嘅幸福去做人阿二，冇名份仲要喺背後俾人講，真係好冇自尊心嘅，佢都係想攞一種安全感，諗唔通先去做咁多壞事，雖然都有好多女人會有咁嘅遭遇，其實現實中邊有咁壞嘅人呀？」
談到劇中印象最深刻的一幕，關菊英指是大契從英國返港趕細契走的一段，她說：「我記得細契同大契講：『我只係講多咗兩句說話，咁有乜嘢錯呀？』其實好多人做錯事都唔會認錯，反而會去辯駁，好反映到現實。」
「我想拍搞笑片」
細契跟隨大鮑夏雨30多年無名無份，但關菊英表示現實中絕不能與任何人分享一個男人，她說：「做女人梗係唔可以同人分享一個男人啦，𠵱家畀我揀，我都唔需要婚姻，女人要增值自己，做到自己嘅事業，有同冇都只係一個伴，有好多嘢係莫強求，而且我本身嘅性格係唔會爭嘢。」她笑言目前對拍劇及唱歌均同樣有興趣，問她最想演甚麼角色時，她說：「最緊要角色有得發揮，我都想拍吓搞笑片，未試過唔知會點呢？」
採訪：王崇穎
攝影：陳俊強
