西甲殺入最後直路，3頭馬車皇家馬德里、巴塞隆拿同西維爾只相距兩分，變數之大難以預料，惟同禮拜六及下個禮拜三嘅國際賽撞晒期，整個西甲有成89名球員被召喚，單係3頭馬車就唔見咗30人，睇嚟呢班國腳嘅體能將成今季西甲盟主嘅分野所在！
西甲一向遲開「咧」遲收「咧」，當其他3大歐洲聯賽曲終人散之時，佢哋依然鬥得火辣辣，但好衰唔衰，撞正國際賽期，巴塞最大鑊，有成12名國腳要去世界各地征戰，而皇馬同西維爾分別有9人，其中包括羅賓奴、碧咸同卡斯拿斯等主力。
除咗外患之外，巴塞仲有唔少內憂等教練列卡特拆解，事關巴西守將比列堤怒罵前者食言，當初氹佢續約話有得踢，點知𠵱家坐足成季冷板咁滯……再加埋朗拿甸奴停賽一場，列帥個頭都有排痕！
另外，有傳媒爆料指，富豪球會巴塞同皇馬，分別向相方嘅對手基達菲同拉科魯尼亞畀獎金，希望佢哋踢得落力啲，可惜兩隊都無緣收到呢筆「第3者獎金」（同告輸波）；但假如未來兩隊嘅對手得到分數，而又被查到收取「第3者獎金」嘅話，唔知係咪要由法庭判決冠軍誰屬？