愛美早已不是女士專利，男士愛面子，KillerAu任職的公司，便有一隊「姿整少爺兵」，他說公司內有數個二十出頭的男同事十分注重儀表，「每日返到公司，先入洗手間10分鐘，搽lotion、gel頭，執靚個樣先返埋位開工。」
他說由於少爺兵太愛扮靚，無心工作，日前終於按捺不住，在洗手間問其中一位男同事為何如此姿整，「佢同我講，讀中學時成班同學已鍾意扮靚，大學時已經有執到正先上堂嘅習慣，佢仲話個個男同學都係咁，邊間學校教咗班咁嘅姿整少爺兵出嚟呀！」
YGM稱，他工作的地盤也有個姿整男，「每次出site前都要搽足太陽油，俾佢激死。」Niji認為人靠衣裝，執正啲無可厚非，「注重外表，可能係尊重份工作，但如果只有外表而唔做正經嘢就錯，如果我係佢哋上司，一定炒魷。」Boy_Tsui更加反駁，「貪靚係人嘅天性，你唔鍾意打扮，唔代表可以歧視人哋打扮，鍾意執得整整齊齊同工作能力無關，人哋做唔到嘢你咪炒人囉，做乜要笑人扮靚？」