無綫劇集《師奶兵團》雖然俾《溏心風暴》結局篇搶咗唔少風頭，不過套劇收視同口碑就越嚟越勁，真係唔好睇小班師奶嘅力量。劇中演員近排亦都好落力宣傳，好似商天娥同艾威呢對劇中夫妻，噚日就齊齊上咗新城電台做訪問，目的當然又係幫套劇催谷吓啦！
艾威大爆劇情，話佢飾演嘅馬大哈避債返內地，衰到仲要搞三搞四，搞到娥姐呢位哈嫂落毒害老公。唔知係咪太入戲，講講吓娥姐竟然扭艾威耳仔，真係搞笑。轉個頭娥姐又講劇中囝囝嘅是非，佢話：「個細路好難湊，成塊磚咁，試過有次佢阻住鏡頭，我想推開佢，但係推都推唔郁，佢個真名叫梁逸羽，個名就好輕，實際係塊磚。」
撐天華舉中指
嚟緊仲有約10集戲，娥姐話有信心可以破《溏心風暴》嘅收視喎，佢仲話到時會睇到大家流幾殼眼淚。至於謝天華俾人話佢用中指托眼鏡，娥姐就好維護咁話佢自己都會用中指托眼鏡，唔覺得有乜問題。
