名模陳嘉容（Eunis）日前承認與丈夫郭子輝（RickyKwok）感情有變，她正物色新屋，但強調並未到離婚階段。昨日Ricky接受本報記者電話訪問，直認兩人現在分居，他表示因工作太忙冷落嬌妻，指兩人少見面但一見面常有拗撬，昨日他承諾一定會𠱁嬌妻回他身邊。
名模陳嘉容的髮型師丈夫郭子輝05年因藏毒被捕，被踢爆兩人已婚，日前Eunis承認兩人感情有變，指雙方均需要有自己空間，故打算找新屋先分居，但強調未達離婚階段。
「少溝通少見面」
Ricky昨日因工作外出，沒有返回中環的髮廊，他在電話接受本報記者訪問時句句癡情，表示一定會𠱁嬌妻回他身邊，他指兩人現在是分居，但未到離婚地步，他說：「唔係好有問題啫，拗撬梗有㗎啦，𠵱家分開吓啫，唔係咁大件事。」
Ricky續說：「因為係大家工作都太忙，我心情OK，Eunis話想有自己空間嘛。」他承認與妻子感情有變原因是各有各忙、聚少離多，他說：「可能我之前有3個月喺內地做嘢，兩個人少溝通少見面，但一見面就拗撬，分開吓都好嘅，少見咪少啲拗撬囉，我會幫佢手搵屋，但係𠵱家都係一齊住，我間髮廊下個月開，𠵱家忙緊新舖嘅嘢。」
Eunis現正在上海工作，問他會否飛去𠱁老婆？他說：「等佢返嚟先啦，𠱁就實𠱁㗎啦，自己老婆嚟㗎嘛。」
「多嘢做有啲躁」
再問到Eunis早前還向傳媒指想生金豬BB，Ricky聽後歎一聲說：「係啦，唔知點解呢頭話生嗰頭又話要分開。」問他是否真的有對妻子冷言冷語？他說：「可能多嘢做個人有啲躁啦，希望你哋（指記者）幫吓手，希望快啲同佢好番啦。」
採訪：JessicaNgan
