時間：96年2月
地點：香港
人物：溫兆倫、陳梅馨
經過：夫妻離婚就話要打官司攞贍養費啫，溫兆倫當年同陳梅馨分手，竟然搞到打官司追討拍拖費，甚至搞到發禁制令咁大陣仗，真係娛樂圈中離奇大新聞。
96年2月，本來準備去英國讀書嘅陳梅馨突然去唔成，原來佢前男友溫兆倫發律師信向佢追討14萬分手費，陳梅馨同傳媒爆料之後，全人類都覺得溫兆倫做男人做成咁實在有點那個，但溫兆倫聲稱佢同對方只係普通朋友，根本冇拍過拖，話當日佢係以公司名義借錢畀陳梅馨同佢家姐應急，唔係拍拖費，冇理由借人錢唔還。
陳梅馨見溫兆倫死口唔認拍拖，於是玩晒冷，將早年溫兆倫寫畀佢嘅肉麻情信同親熱相攞出嚟畀傳媒刊登，證明佢兩個嘅親密關係。點知溫兆倫都不甘示弱，即刻向法庭申請禁制令禁制陳梅馨離開香港，仲連續發咗兩份，但最後兩份禁制令都俾陳梅馨打甩。
呢件追討拍拖費事件，令溫兆倫嘅形象同事業直插谷底，到今時今日都翻唔到身。至於陳梅馨都唔好得佢好多，98年佢介入姜皓文同金慧英之間做第三者，抹殺咗外界對佢嘅同情。
本欄逢周一至周六刊出