最近日日攝氏30幾度，熱到口擘擘──唔係想食嘢喎，係散熱啫。尤其細路仔，咁熱仲叫佢食飯真係睬你都儍，最好餐餐汽水雪糕，但係呢啲冇益㗎嘛！其實要阿仔食多啖飯，當然唔係整「藤條燜豬肉」咁唔文明啦，諗吓計，煮幾味甜甜酸酸菜式，自然飯都扒多幾碗啦！
記者：趙珮倩
攝影：陳盛臣
示範：富豪機場酒店
紅軒（22868888）符豪翼師傅
Model：蔡文斌@TheGroup
點只醒胃咁簡單？
甜酸味道的餸菜除了可以刺激胃口之外，部份甜酸「功臣」如菠蘿，含酵素，可幫助分解肉類中的蛋白質，更易消化，減低飽滯感；而番茄、橙肉、檸檬等材料，則含豐富維他命C，是抗氧化高手，可增加皮膚彈性，預防色斑，更有助降低血液中的膽固醇，減少靜脈栓塞的機會。所以話甜酸餸菜又點只醒胃咁簡單呢？
富貴圍蝦仁寬條麵
需時：20分鐘
價錢：$12/1人
材料：新鮮蝦仁3両、芥蘭、芽菜、粗麵1碗
汁料：豆瓣醬1/2茶匙、茄汁1茶匙、泰式雞醬1茶匙
做法：先將鮮蝦灼熟去殼，芥蘭/芽菜洗淨切條備用；粗麵走油，瀝亁油備用。先炒熟芥蘭/芽菜，粗麵/蝦仁回鑊，下豆瓣醬/茄汁/泰式雞醬，燜1分鐘即可。
梅汁脆鱔球
需時：1小時15分鐘
價錢：$70/3人
材料：鱔8両、生粉少許
汁料：梅子2粒、水100毫升、生抽/醋各1茶匙、金絲糖膠3茶匙、青檸1/2個（榨汁）
做法：原條鱔起骨，沾上生粉水後吊亁約1小時，切片，再蘸上少許生粉，放入滾油炸至金黃。汁料撈勻以猛火煮滾成梅汁，淋鱔球上即可。
貼士：鱔肉要完全吊亁才可下鑊炸，否則肉質會韌。
酸甜五香果肉
需時：1小時30分鐘
價錢：$25/4人
材料：豬肉8件、芋頭/馬蹄各1両、腐皮1/2塊、青椒/紅椒/菠蘿粒各少許、生粉1茶匙、蛋白1隻
汁料：茄汁5茶匙、醋5湯匙、片糖1片、甜酸汁2茶匙、喼汁1茶匙、水3湯匙
做法：豬肉以生粉/蛋白醃15分鐘備用；芋頭/馬蹄切幼絲，將芋頭絲炸至金黃備用；以腐皮包捲豬肉/炸芋頭絲/馬蹄絲，放入熱油中炸至金黃，撈起瀝油。最後將青椒/紅椒/菠蘿粒加入汁料煮滾，淋上肉卷面即可。
貼士：炸好的芋頭絲可放冰格雪15分鐘，吃起來會更香脆。
香橙煎雞
需時：45分鐘
價錢：20/2人
材料：雞髀肉8両、鹽/生粉各少許、雞蛋1隻
汁料：鮮橙1/2個（起肉）、君度酒/醋各1茶匙、糖3茶匙、水75毫升、橙汁125毫升
做法：將雞髀肉洗淨，吸亁水份後切件，加入雞蛋/鹽/生粉拌勻，醃20至30分鐘備用。燒熱油，以中火將雞髀肉兩面煎至金黃色；將汁料煮滾，下橙肉/橙汁埋芡，淋雞件上即可。
