人物：姜大偉、李琳琳、周嘉玲
時間：94年6月
地點：香港
經過：喺《師奶兵團》入面，姜大偉同鄧萃雯將會有一段婚外情，佢哋只係做戲咁做，冇話戲假情真，唔似得94年姜大偉同周嘉玲合作拍攝嘅劇集《再見亦是老婆》，竟然拍拍吓嚟真！
當年喺《再》劇入面，姜大偉飾演陳秀雯老公，因為受唔住飾演壞女人嘅周嘉玲誘惑，同周嘉玲大搞婚外情，後來仲拋妻棄子；點知94年6月，佢哋拍拍吓被傳過電，兩個人經常打情罵俏，戲假情真，李琳琳收到風之後，即刻由加拿大溫哥華飛返香港昅實老公，做跟得夫人，姜大偉同周嘉玲嘅緋聞先至告一段落。
不過，當年李琳琳接受傳媒訪問時，口口聲聲話信任老公，對於呢件事，佢一啲都冇懷疑過，李琳琳解釋佢返香港只係暑假關係，又話特登喺錄影廠同姜大偉慶祝生日，佢前前後後只係探過老公三、四次班。雖然李琳琳否認監視老公，但95年，47歲嘅琳琳姐竟然唔覺意有咗BB，做咗高齡產婦，幫姜大偉生咗個香爐躉卓文，原本只得兩個女嘅姜大偉梗係開心到飛起，到99年5月，姜大偉同李琳琳為慶祝結婚25周年，專登再舉行婚禮大事慶祝，兩公婆到𠵱家都依然係咁恩愛。
本欄逢周一至周六刊出