不得不佩服國產機「創意」，NokiaN95玩雙推蓋已破格；純國產血統「中電通5200+」勁挑三推蓋！打橫、向下之餘，仲多個打斜推；先達Sales笑住話：「真係勁過板仔平時練習用嘅手指板！」每種推法、都有玩法；咦？推開點解會有十字、AB掣嘅？竟然離譜到玩經典紅白機模擬器，$1,280部TouchScreen兼PDA手機，估唔到可以玩到咁鬼爆！
記者：馬靜兒 攝影：陳陶鈞
Model：Lo
首創三推蓋設計
NokiaN95嘅雙推蓋設計，一邊用嚟打電話，另一邊就係音樂導向鍵。呢部國產中電通5200+則採用三推蓋設計，向下推是平日手機模式，數字鍵加十字功能操控盤馬上出晒嚟；向橫推則是打機專用鍵盤；最別致係可以打斜推，𢱑爆頭都諗唔到有乜特別用處，只係一次過見晒所有按鍵，可能為咗方便大家邊打機又邊打電話！
離譜！
模擬紅白Game
一開機，過場的音樂和畫面都好誇張。但我對部機嘅遊戲有興趣多啲。打開遊戲Menu，Mario、炸彈人、大力水手、沙羅曼蛇全部出晒嚟，睇遊戲版本，明顯係紅白機模擬器，N年前經典舊Game翻兜嚟玩老翻，真係勁離譜，更過份係連操控都係十字掣加A、B鍵，中置一個大喇叭，好似驚死人唔知你打老翻！據知佢仲有MicroSD「插卡入Game」設計，真係「翻」得徹底！
PDA功能玩自家OS
手機功能方面，基本行GSM雙頻，玩130萬像素鏡頭，可影相又拍片；PDA功能玩自家OS，想加外掛程式就免問喇，不過內置有MP3、國內地圖、日程表等功能，應該都好夠玩；機身仲設有藍芽傳輸功能，掟資料、圖片，兼玩無線Hands-free，顯示屏更方便玩TouchScreen，睇啱嗰樣用Stylus輕篤就搞掂，以$1,280一部PDA手機嚟講，都算抵玩。
有冇興趣買？
阿Lo：「三推蓋係首見，但其實雙推蓋都夠啦！千零蚊玩PDA手機，抵玩！」
阿Yuen：「有紅白Game打，都幾好笑喎！不過玩老翻就始終唔多啱。」
阿昌：「千幾蚊有咁多嘢玩，兩個月換一次機都抵啦！」
Rachel：「得意囉！但我唔鍾意大陸機，一定唔會買。」
中電通5200+
Profile：GSM雙頻、藍芽、130萬像素影相、內置64MB、送512MBMicroSD記憶卡。
