加利尼維利同碧咸不嬲都好老死，後者喺99年結婚嗰陣，加利仔仲做埋伴郎㖭。話說加利仔下月16號就會同女友艾瑪拉埋天窗，碧咸當然要到啦，點知呢位萬人迷近期踢到曉飛，搞到皇馬直情冇咗佢唔得；𠵱家西甲爭標入晒最後直路，煞科戰咁啱又喺下月17號踢，睇嚟碧咸呢次肯定抽唔到身，出席老友婚禮囉。