英超球隊曼聯剛捧走失落3年的聯賽冠軍，隊中「雙朗」基斯坦奴朗拿度（CristianoRonaldo，簡稱C朗）及朗尼（WayneRooney）已急不及待前往美國度假散心。C朗暫時撇下女友，與大班男性友人享受陽光，而快將與女友拉埋天窗的朗尼，則趁放假搵真銀。
不諳水性頻墮海
現年22歲的C朗經過一整季的辛勞後，上周趁着球季結束，便立即與友人齊齊飛到美國佛羅里達州的邁阿密度假。雖然C朗傳與三線電視女星GemmaAtkinson打得火熱，但今次同行的只有大班男性友人。有攝影師日前拍到他於海灘曬太陽的照片，一身泳褲及太陽鏡打扮的C朗，不時大晒健碩身材。不過於球場上逢人過人的C朗不諳水性，於駕駛水上電單車時多次失控跌入水中，認真失禮。
郁兩郁身水身汗
另邊廂，C朗的隊友朗尼同樣身在美國，不過他卻寓放假於工作。身為英格蘭國腳的朗尼，因為停賽關係，未能為英格蘭後日友賽巴西及下周歐國盃外圍賽迎戰愛沙尼亞，結果他趁空檔飛到俄勒岡州的Nike總部，並於日內與其他體育紅星拍攝來季Nike的全新廣告。朗尼前日被目睹於Nike總部打網球，只見他似乎未適應當地的炎熱天氣，稍作走動已見身水身汗，但原來腳下功夫了得的朗尼，網球技術同樣一流。