現今年輕人個個都係見光死，唯一可以推動大家早啲起身做吓運動，相信就只有約埋成班朋友仔去沙灘玩。夏天陽光與海灘，唔玩足一日都唔捨得走。齋曬咁懨悶！一定要帶定些沙灘玩意去自娛一番。即刻帶齊沙灘裝備，水戰用具，喺石澳上演一幕決戰水戰王啦！
記者：許維雅
攝影：黃子偉、陳陶鈞
Model：CC、Kinki、Ben、Pakho
吹氣扑儍瓜
無論你識唔識游水，去沙灘總要有一兩件吹氣浮物。吹氣浮物可謂每年沙灘主角，事關你想趴喺浮物之上靜靜地曬吓太陽又得，一班人於水中爭上去坐，笑一大餐又得。不過，要增加刺激性，有支吹氣棒扑人落水會仲好笑啲，全新AquaDefenders的設計玩意就好有《歡樂今宵》的遊戲Feel，扑人嗰個開心，睇嘅亦夠晒娛樂性！
AquaDefenders（吹氣棒連座椅）
玩法：坐在U字形吹氣墊之上，再用吹氣棒將對方打落水。相中兩個靚女就係玩緊佢嘞！
Model試後感：個設計意念好好，玩同睇嗰個都咁好笑，可惜吹氣棒中間位置設計太幼，顯得有點軟身同唔夠力，好難將對方打落水。
浮麵積木任組合
玩法：一條夠力令兩個人浮於水中的FloatingNoodles，再利用關節接駁成不同形狀，勝在夠平!成班人拖去邊度玩都得。
Model試後感：好玩就幾好玩，可惜Connector有啲接駁得唔係太實，玩得太癲就好容易散。
低B水槍夠強力！
去沙灘除了曬太陽，總要帶些沙灘玩意。咁多遊戲，水戰絕對係最多人的首選。今個夏天的水槍，無論容量及射程都比之前更大更遠，其中圓筒形手動氣壓水槍MaxLiquidator更係今夏推介，價錢平平哋、外貌無乜殺傷力，但每拉一下，射出嚟水柱配合氣壓之下有30呎射程，感覺LowTech、低B得嚟十分過癮。另外，岸上玩意就可試吓最新玩具TwisterScram，原理跟爭凳仔差不多，大家逼吓逼吓，要熟絡冇難度啦。
爭凳仔TwisterScram
玩法：將4種不同顏色的軟墊隨意鋪在沙灘之上，5個人玩就用4塊，餘此類推。再有公證用色板抽出顏色，鬥快跑去該顏色軟墊，爭唔到就輸！
Model試玩感：一班Model一路影一路玩，影完都唔停，繼續玩落去，成班人即刻熟絡晒，問佢哋好唔好玩都多餘！
曬太陽AV要防水
不少人到沙灘只求曬得一身古銅色，一個人躺着，有歌聽吓最爽，曬太陽都特別Relax。所以防水音響用品絕不少得。男仔喜歡瀟灑有型，太陽眼鏡連MP3機就最適合；女仔喜歡邊聽歌聽講吓心事，防水iPod喇叭最啱使。
其他沙灘裝備
去得同陽光玩遊戲，沙灘蓆、沙灘帽等配件總唔少得。
Shoplist
（A）玩具反斗城（28811728）
（B）Quiksilver（28955948）
（C）Playboy（28314644）
（D）adidas旗艦店（27300157）
（E）JCShop（31022783）
（F）金輝玩具（23903337）