近年專注在內地發展的謝霆鋒，前晚在銅鑼灣為內地服裝品牌拍攝平面廣告，他表示下月會返無錫續拍《浣花洗劍錄》，並堅持不准懷孕妻栢芝乘坐飛機相陪。對於栢芝跟向太的官司，霆鋒表示未有聽栢芝提及。
謝霆鋒及Twins前晚在銅鑼灣駱克道行人專用區為內地服裝品牌拍攝平面廣告，今次已是他們第五年跟該品牌合作，據知廣告商原本打算安排赴日取景，可惜他們檔期未能配合，惟有留港拍攝。
着冬裝跳餐死
前晚先拍攝Twins的部份，之後霆鋒在晚上約9點15分現身，但圍觀者只得十數人，場面未算哄動。現場所見，廣告商事前並未有申請封街拍照，見他們都是趁沒有車駛進時，行出馬路匆匆拍攝。霆鋒穿上秋冬風褸，並要做出跳躍動作，但前晚天氣炎熱，他拍得頗辛苦。
近年主力在內地工作的霆鋒，前晚被問到在港拍廣告是否很熱時，他說：「冇計，冇辦法，夏天就着冬天衫，冬天就着夏天衫，不過唔會拍太耐，會再拍過。」
𠱁妻招數嘔飯
提到原本該廣告打算往日本取景，問霆鋒可希望去日本，他聞言說：「唔會喎，唔一定去第二度就值錢過香港。」早前有指其妻栢芝懷孕後患上牙周病，霆鋒即護妻情切說：「唔係，係我去睇牙醫，佢陪我去，佢順便睇埋，係我自己啲牙有啲神經線壓住牙根，可能之前拍戲整親。」栢芝向中國星經理人公司追討近1,500萬的合約欠款，霆鋒表示栢芝沒有向他提及。
栢芝將於8月生BB，霆鋒透露下月4日會飛回無錫續拍《浣花洗劍錄》，此行是否不准栢芝坐飛機陪同，他說：「佢今次喊都唔畀佢飛，之前我去親佢都唔開心。」問他可擔心栢芝患有產前抑鬱症，霆鋒稱不擔心，他更認為栢芝為人硬淨，問他用甚麼方法𠱁太太，霆鋒笑稱：「唔係要我喺度示範你睇呀，你哋噚晚有冇食飯，我驚你哋嘔番出嚟。」問他栢芝可會擇日生產，他笑說：「唔通佢要出嚟，夾硬塞番佢入去咩？」
採訪：駱華齡 攝影：陳慧安
