轆Book：極速劈橙<br>珠海賽道盡情任踩

轆Book：極速劈橙
珠海賽道盡情任踩

Audi每年都會喺珠海搞個AudiDrivingExperience，擺下最新最強嘅車陣，俾傳媒盡情任踩任試！而今年新車雖只得一部S3Quattro，不過鮮橙車身搭鍍銀鬼面罩，離遠望到已Sharp爆全場，最正係賽道又闊又安全，令小記可拋開一切，狂開Turbo、盡情一劈呢隻「橙」！

記者：周達之
攝影：陳偉強

極型車身太吸引

一直已經好期待AudiS3Quattro，估唔到有機會喺珠海賽車場放盡嚟跑！去到車場，離遠已望到一身鮮橙色打扮嘅S3，再睇真啲，發覺鬼面罩經電鍍處理，夾埋當日猛烈陽光，真係閃到眼都花！加埋前方擾流器特大進氣口，未揸已感受到其霸氣！

■完成所有體驗項目之後，大會仲有證書頒發，好開心！

■XenonPlus車頭燈，夠照，不過當日用唔着。

■尾喉係S系獨有嘅橢圓形。

■側鏡玩撞色，銀撞橙撞得好應。

■18吋S系合金軨，令S3更有霸氣。

Turbo大改良

雖然大會安排咗德國嚟嘅專家講解部車，不過呢部車嘅資料小記一早已經熟晒，所以無乜心機聽，淨係想快啲有得試。好彩會方都知我哋心意，講解都只係用咗半粒鐘，之後就安排各傳媒輪流試車。
全新S3所用嘅2.0公升TFSI引擎，加埋Turbo，最高馬力可以去到265匹，比起上代高出65匹，0至100都只係5.7秒！呢副引擎基本上同上一個版本一樣，之所以馬力有所提升，其實係因為佢加大咗個Turbo，兼且改良埋冷卻系統，令進氣溫度減低，燃燒效率更佳。另外值得一提嘅係香港版嘅車身係降低咗25mm，令到佢更適合喺香港作日常使用。

■軚盤採用吸汗物料防止跣手，實唔實用就見仁見智喇。

■6前速密比手動波箱，正！

■黑襯橙座椅，型爆！尾座手枕更有埋杯座，細心！

■渦輪同壓縮轉子輸出高達1.2bar大氣壓力。

超感動試車

落到場跑嗰一刻實在令人感動，唔使好似喺香港試車咁就住就住，不過小記以安全為上都唔敢開太快，只係140km/h左右，入彎嗰陣一扭堂軚，條胎居然可以死咬住地下唔放，毫無跣胎迹象，行車線仍然完全喺小記嘅掌握之內，夠易揸！直路一段轉波加速順滑流暢，除咗係因為小記技術好之外，佢嘅6前速密比手動波箱亦應記一功！另外小記亦覺得S3嘅桶座承托非常之好，左片右片都可以令到車手保持穩定。S3係常時四驅，車重比例係50:50，再加埋今次試呢個版本係調低咗25mm車身，行車穩定亦無推頭，認真無得頂！
講到個Brake就只可以用個「應」字嚟形容，至於油門就更加無話可說，一踩架車即刻標前，背脊貼實晒張椅，直情坐過山車一樣！兩個圈嘅試車話咁快就完，行出車即時聞到強烈𤓓味，望吓條起晒煙嘅胎，可想而知當時玩得幾盡！