利物浦輸波畀AC米蘭，一場悶戰，完全冇睇頭，左丁山早上三時起床觀戰，睇到猛咁打喊露，好彩自己並非任何球隊嘅擁躉，只係想睇好波啫。
當今足球，最緊要贏，踢得好唔好睇，唔係領隊嘅第一要務，銀河艦隊皇家馬德里以往一向要贏得悅目，踢得精彩，但今季僱用意大利人卡比路領軍，已經改變踢法，務求穩陣，取勝為先。全英踢波傳球最好嘅，一定係阿仙奴，但係在英超聯排第四，喺歐冠盃畀燕豪芬悶死咗，好彩領隊係雲格啫，第二個一定被炒魷。
利物浦領隊賓尼廸斯精於計算，對AC米蘭竟然只出一個前鋒古治，收埋高治、比拿美，謝拉特一向踢後上中場最好，但今場係當前鋒，明顯係賓尼廸斯對AC敬而畏之（paystoomuchrespect），先求守死卡卡，與AC中場老虎卡度素爭中場控制權，處自己於不敗之地先，守和全場，到加時先至出高治打衝鋒，衝散AC嘅老人防線。如此求和不求勝嘅領隊心態，保守到極，利物浦擁躉可謂欲哭無淚。
利物浦上半場輸波後，下半場仲係原班陣容，到七十八分鐘先至放高治出嚟，果然立即有威脅，但以高治換賓納特或阿朗素，縮番謝拉特打中場就話好啫，佢竟然係替換全場防守出色，令卡卡冇威脅嘅馬斯安奴出場，於是卡卡成身鬆晒，喺八十一分鐘與恩沙基合作，一腳妙傳，四個利物浦後衞掛住望卡卡，唔識得阻止恩沙基入楔，於是輸多一球。仲有九分鐘，全面反撲喇啩？賓尼廸斯竟然以右後衞換右後衞，唔放比拿美去前鋒搶，搞邊科呀！如果領隊係摩連奴，第五十分鐘就打三個前鋒啦。
難得賓尼廸斯賽後仲賴球員唔夠班，要求老闆畀億億聲（英鎊喎）嚟大換血。冇錯，辛頓、賓納特、基維爾等人係差一皮，但為何有份出場？為何經常要以謝拉特打右中場或甚至前鋒？斷斤秤，AC球員質素係高啲，但賓尼廸斯做領隊更加唔夠秤，差安察洛堤、摩連奴、費格遜一皮。