英超聯球季完咗冇幾耐,但熱刺就開始組軍,高價簽新星,又高薪留班主力,嚟睇好有雄心,想喺新一季挑戰歐聯席位,甚至超聯錦標。
羅比堅尼千萬鎊續約
熱刺係20世紀首間成為聯賽及足盃雙料冠軍,亦係首間攞歐洲錦標嘅英球會。但近呢20年,最叻係捧過一次足總盃同聯賽盃,梗係好想重振雄風。
熱刺除咗用1,000萬鎊(約1億5,500萬港元)從修咸頓簽入威爾斯超新星加里夫巴利,亦計劃用1,350萬鎊從士砵亭引入「新C朗」葡萄牙中場拿尼,同用800萬鎊買歐塞爾嘅法國後衞卡保奧。咁都未算,佢哋又同陣中嘅愛爾蘭前鋒羅比堅尼續咗份總值1,000萬鎊嘅5年合約;另外,為咗留住被曼聯打主意嘅貝碧托夫,佢哋願向對方開出5年新約,周薪仲由22,000鎊加至40,000鎊。
熱刺今屆同前屆都以第5名過終點,但只比兩屆都得殿軍嘅阿仙奴少8分同埋2分。來屆佢哋大搞,我求大俠唔敢話佢哋可以突然勁到挑戰到車路士同曼聯,不過入前4名打歐聯,應該唔係遙不可及嘅事。