巴塞隆拿上場聯賽1:0擊敗基達菲保爭標希望，原本因從後侵犯對手領紅而被罰停賽兩場嘅中場朗拿甸奴，日前獲得西班牙足總減刑改坐波監1場，令「細哨」可以喺煞科戰作客塔拉戈納復出。
巴塞打吡戰有凶險
西甲𠵱家得番兩輪秩序，皇馬只要全勝，就唔使理巴塞嗰邊踢成點。巴塞下場仲要迎戰愛斯賓奴上演巴塞隆拿市打吡戰，外間都認為冇咗「細哨」，全取3分有難度。不過𠵱家「細哨」突然減刑，唔通整定佢喺煞科戰復出，令巴塞可以從後趕上封王？
雖然西班牙嗰邊話朗拿甸奴僅停1場，大鬧西班牙足總大細超；我求大俠就覺得「細哨」上場侵犯基達菲球員，領紅牌被逐係好應該，但要停兩場就唔係好合理囉。老實啲講句，今次足總改罰停1場，我認為咁先至公平。
其實，西甲近季冠軍俾巴塞囊括晒，傳媒偏幫皇馬都算合情合理。但係皇馬只要贏晒薩拉戈薩同馬略卡，基本上已冠軍在手，使乜理「細哨」要停幾多場？皇馬一於靠自己嘅實力攞走冠軍，叫所有人收口咪得囉！