上到陸羽，賓架黎大罵利物浦領隊賓尼廸斯冇用：「畀錢佢買球員？有球員佢都唔識得用啦！基維爾傷足全季，只踢過三十分鐘波，就喺歐冠盃咁重要嘅賽事派佢上陣，點解唔用拼勁好，速度高嘅比拿美入場搏殺呀，賓尼廸斯對球員好唔公道。」
對住一個有偏見嘅領導人，下屬邊有說話好講。講完波，講番股市，港股跌，ＡＢ股升，內地股民一於唔理得中央宏調政策咁多。人民銀行行長周小川做咗五年，明年夠六十歲，唔升官就要調職，好可能在秋季開十七大之前就會有決定，睇嚟已經冇乜板斧阻止大泡沫形成咯。社保基金理事長項懷誠話啤酒冇泡唔好飲，「股市一點泡沫也沒有就沒有意思了，現在來看，泡沫是有點多。」多成點，內地財金官員冇個敢講，因責任太大也。如果股市大跌，百分之一嘅股民到天安門嘈，邊個敢負責？
講起啤酒泡，格林斯潘退任前，曾經講過。佢講股市有froth未有bubble。Froth就係啤酒泡嘞，frothy就係淺薄，空洞咁嘅意思，項懷誠理事長知識廣博，嚟到香港講啤酒泡沫，可能參考過格林斯潘。項懷誠又話現在賣Ａ股係儍瓜，因為賣完就升，賺少好多啫。其實社保基金並非唔賣股票，交易所資料就顯示社保基金最近減持株洲南車與大連港Ｈ股啦。
與一位經濟師講起社保基金與國企持有好多Ａ股，目前應唔應該沽貨呢？經濟師話：「中國自古以來，人民都希望政府干預，王安石嘅平準法，今日喺台灣與大陸都以不同形式存在。既然係咁，他日Ａ股大調整，中央唔出手托市嘅話，一定畀人鬧，只會在香港咁民智已開（股民智慧也）嘅地方，先至有人反對政府干預市場嘅啫。其實Ａ股一路升，國企與各類基金應該不斷出貨獲利回套，遲早股市大跌，國企與各類基金就有大把本錢買股托市，紓緩跌市啦。」此話合乎國情，未必無理，只係欠個水晶球唔知幾時跌而已。