唔少大企業每年花好多人力物力推動「企業社會責任」，仲出埋報告，講吓做過啲咩嘢好人好事，內容梗係沉悶到痹啦。
不過，最近有份企業社會責任報告吸引華華，就係建設銀行嘅《2006年度企業社會責任報告》，聽講，係中國嘅國有控股商業銀行第一份呢類報告，有成50頁咁厚，裏面有條數講建行同國家點樣拆賬。
根據報告話，建行自從股改上市後，每賺10蚊、國家大約得到8個半，藉此證明建行利益同國家利益仍然高度統一；究竟呢條數點樣計出嚟，真係個謎。
建行大股東中央滙金（即金融國資委）同中國建投（中央滙金全資控股），夾埋揸住大約71%，簡單推論，建行每賺10蚊、國家收7個1，點樣計到8個半呢？