噚日創業板公司優能數碼出通告，話上個禮拜一董事會決定下個月18號召開股東特別大會，動議罷免副主席吳炎剛，同埋執行董事孫貴平職位。
搞乜嘢咁激！華華噚日先寫過第一太平彭澤仁啱啱俾芬佬要求落台，但係董事會內大多數董事贊成罷免副主席，仲要呢個副主席係大股東嘅董事。咁就比較罕見！
通告話，大多數董事認為，呢兩位人兄任內冇任何重大貢獻，兼且出任要職期間，同時擔任其他公司嘅全職職位，令二人未能抽出充足時間及精神參與公司管理。
睇番吳副主席同埋孫執董嘅背景，兩人現時全職喺湖北清江水電開發有限公司做嘢，吳生係副總經理；孫生係紀委書記。本來身兼多職，被人怪責難免。但兩位人兄由第一日做董事，已經申報呢個職位。呢間湖北清江並非第三者，根本係優能數碼嘅最終大股東。優能嘅大股東係Infonet，而Infonet嘅大股東就係湖北清江（見表）。
兩個都不能留
更有趣嘅係，現時優能董事會有五名執董及三名獨立非執董，其中一名執董及兩名獨立非執董係喺上個禮拜一委任，即係召開董事會嗰日。仲有另外一名執董2月1日先接任，取代Infonet股東之一嘅張政。
八個董事（其中四個新嚟嘅）要罷免其中兩個，相信原本兩個董事喺呢件事上影響力好大，若其中一個係非執董，剩下嚟嘅人即主席蔡祖平喺罷免事件扮演重要角色，而佢亦都係Infonet嘅第二大股東。
所以，優能大股東喺呢個罷免議案會投乜嘢票起決定性作用，因為只要50%出席會議股東贊成就可通過動議，而Infonet揸住44.7%優能數碼股權。