時間：2000年2月16日
地點：美國
人物：鄭中基
經過：醉酒鬧事呢樣嘢，喺圈中經常發生，好似早排鈴木仁被打，就因為有人飲大幾杯之故，但搞到飛機緊急降落兼留案底，睇怕鄭中基都算係最大鑊嘅一個。
2000年2月16日，鄭中基乘搭長榮客機由美國洛杉磯去台北，途中佢飲酒飲到high晒，仲喺機上邊食煙兼大大聲聲講說話，空姐同機艙服務員上前制止嘅時候，鄭中基唔單止唔肯靜落嚟，而且佢仲扯空姐頭髮同用手叉副機長條頸，機長見唔對路，惟有用電筒扑穿鄭中基個頭將佢制服，然後將飛機緊急降落美國阿拉斯加首府安克雷奇（Anchorage）。
飛機急降之後，美國FBI即刻將鄭中基拘捕，控告佢襲擊同騷擾兩項罪名。件案喺同年2月19號喺安克雷奇聯邦法院開審，鄭中基第一時間認罪，佢當日喺庭上解釋，話自己食咗安眠藥之後飲咗好多酒，唔知道自己做過啲乜嘢，又承諾以後唔飲酒，結果被判罰2,500美元（約19,500港元）兼留案底。飲酒飲到咁，真係唔知為乜！呢件事之後，長榮並冇將鄭中基列入黑名單。
本欄逢周一至周六刊出