電訊行頭靜咗一排之後，終於有大新聞──CSL行政總裁伍清華「七年之癢」！千祈唔好心邪，查實只係伍爺要同CSL結束七年情，講byebye咋！伍爺噚晚都親口承認咗呢個傳咗幾個月嘅「分手」傳聞（sorry，𠵱家已變成事實）。
香港殿堂級電訊教父之一嘅伍爺話，佢呢個級數嘅員工要半年通知，（因為佢唔係姓蘇，所以唔可以話唔do就即刻撇）所以佢係響2月中遞信，扣晒假之後，7月中就可以鬆人。
澳洲幫搵同胞幫手
到時，C記真主子澳洲幫Telstra，就會搵個澳洲人坐佢個位，咁好哋哋做乜唔do？係咪做咗幾十年電訊覺得厭，諗住退休歎世界呢？又或者係傳聞之一，澳洲幫唔滿意佢嘅表現？
伍爺冇乜點交代，只係好灑脫咁話，佢想尋求個人發展，一定唔係退休！咁會唔會再做電訊？佢冇講。bytheway，伍爺係自己辭職唔do，大家唔好亂諗……講真，伍爺當然唔會屬於年輕力壯啦，但又好似有排都未夠鐘退休，咁呢個年紀如果轉行，可以有咩新嘅個人發展呢？華華真係好想知道！
想轉行做芬佬？
之不過咁，以伍清華咁厚底，幾十年嚟先後服侍過英國佬（香港電訊）、新地郭家（數碼通）、李家二少澤楷（C記）同埋澳洲幫（都係C記，佢哋向二少買咗），人緣實戰經驗兼備，如果呢個行頭仲有位，絕對應該搵佢！
不過咁，先排啲新股投資者推介午宴，好似洛陽鉬業嗰次，伍爺居然列席，唔通，佢想臨老轉行做芬佬？
[email protected]