手機有3G，即係第三代流動電話；估唔到股市已經去到4G，即係第四代股民。大陸網友心之封印喺《中金貼吧》話，𠵱家喺股市裏面有一班年少氣盛，受過高等教育，有份收入唔錯嘅工，對經濟走勢較為敏感，但面對股市風險無所畏懼嘅新力軍。佢哋大多數30歲左右，當中有唔少女性，多數係獨生子女，冇受過咩大挫折，心理承受能力較差，鍾意喺網上炒股，呢一批就係所謂嘅第四代股民。
四代股民面面觀
心之封印仲將四代股民比較：
第一代股民──大陸啱啱有股市時嘅第一批散戶，特點係勇於試驗、探路；
第二代股民──喺股市高潮時期，被賺錢神話吸引落搭嘅散戶，特點係一再上當受騙；
第三代股民──跟住啲基金大戶入市嘅散戶，特點係跟住大戶指揮棒，自己轉到頭都暈；
第四代股民──當股市跌到低位，以為自己可以喺「相對低位」入市嘅散戶。
膽大心急唔識死
至於4G股民有乜特點？
一、膽大──越蝕越買，ST股（公司連蝕兩年，或每股資產低於股票面值，每天漲跌限制在5%內）、即將除牌嘅股票照買。佢哋嘅炒股金句係：「不管黑貓白貓，只要能炒就係好貓」、「人有多大膽，股價就有多高」。
二、心急──渴望一夜暴富。樓可以唔買、車可以唔開，但股票唔能夠唔炒。4G股民由於有好多渠道得到消息，手頭又有資金，加上初生之犢不怕虎，所以前仆後繼去試水。
三、缺乏經驗──完全唔識股市、唔識睇圖表，亦都唔識咩專業術語，冇投資經驗，但係大多數都「無知、無畏」。
四、不知風險──唔知道股市係投機市場，亦都係風險市場。
http://post.cnfol.com/thread/269066.html
報料站
歡迎提供網上財經趣聞，資料一經採用，酬100元。
請附姓名、電話及電郵地址，交[email protected]