「蓮華生輝」火併「無敵神駒」，本以為會好刺激，點知跑起嚟，似AC米蘭對利物浦爭歐冠盃，一無足觀，未免令馬迷失望。上星期四佛誕假期有馬跑，成班老友入場睇全日戲肉，第八場嘅「滙豐卓越理財沙田銀瓶」，以為兩隻長勝馬單打獨鬥，點知變成係「無敵神駒」表演賽，以一分零七秒七嘅破紀錄時速贏咗千二米。
「無敵神駒」六勝千二米，愈跑愈快，既然輕勝「蓮華生輝」，當上今季短途馬王，殆無疑問。左丁山以為在佛誕買「蓮華生輝」，非常應景，點知幾乎輸死，好彩捉到隻大冷馬「心中有理」，仍然中到半條複式三重彩，補番啲大注有突。不久前碰到鐘錶Ｌ，講起馬經，先知道佢係「無敵神駒」馬主「無敵友團體」嘅成員，佢大呼夠運，因為隻馬由練馬師蘇保羅買嘅，唔使一百萬元，真係超值到暈。
滙豐一姐賓架Ｍ主持盛會，喺馬會廂房招待工商金融部客戶，左丁山雖然冇資格向賓架Ｍ借錢，但大家相識咁耐，每年都收到請帖，欣然赴會。賓架Ｍ邊有時間睇馬吖，佢嘅另一半牙醫Ｌ就係專家，佢與皇仁書院校友擁有嘅「皇仁飛駒」，今季戰績彪炳，已經收夠籌，下季再玩過。到第八場「滙豐卓越理財沙田銀瓶」，賓架Ｍ到沙圈頒馬匹「最佳外觀獎」。馬會女職員宣佈：「滙豐總經理梁高美懿女士與丈夫……」好似有啲刺耳噃，唔係應該講：「某某女士與先生」嘅咩？英文當然係講Mrs.Leungandhusband，但直譯硬譯，未免唔識轉膊。如果係男士頒獎，英文講Mr.Leungandwife，廣東話唔會譯為「梁先生與妻子」，而係「梁先生與太太」。
跑馬係滙豐傳統，原本滙豐高層都係馬會主席或者董事，銀行內養馬有唔同團體，英國人為主嘅「滙豐團體」養馬成績比較普通，好似佢哋嘅現役馬「創富專家」（MakeaMint）就係水馬，唔夠鄭海泉、梁高美懿、劉智傑等人嘅「過關博士」好。滙豐識得運用自己嘅招牌，贊助賽馬，招待客戶入場，加強聯誼，呢一招，其他銀行仲未識用。