昨日港股雖然食住上禮拜五花旗股市個勢炒上，但係跟買藍籌嘅人就唔多，早段升過成百點，收市幾乎打回原形，好彩唔使跌，好友唔夠勇，可能同昨晚花旗放假有關。
今日拍賣官地，不過昨日都冇旺到地產股，成個場只係見啲股仔群鶯亂舞，禾雀亂飛，升幅小過18.3%，都冇資格登上50大正股升幅龍虎榜，都算誇張，咁嘅市況係咪叫癲市，睇番大藍籌一啲都唔癲，只能夠話班炒家睇準時間攝位炒番轉，睇嚟咁嘅局面仍然會維持多幾日。
大戶仲好努力咁轉緊倉，睇期指未平倉合約咁多，大市成交咁靜，都係唔多盞，有山雨欲來之勢，期指結算後無論抽高或插落，殺傷力都會好驚人。
恒地C輪7542：自從四叔做咗「亞洲股神」之後，佢嘅一舉一動都好矚目，難怪恒地（012）股價去到低位都好有承接力，昨日股價高收53元，升咗2%，一啲都唔失禮，短線有機會試55元，破位就睇57.50元，可以買啲恒地C輪7542，隻輪昨日收48.5仙，有效槓桿率7.8倍，正股升上55元同57.50元，7542應該喺62仙同82仙樓上，正股跌穿51元止蝕。