投資Ｈ請食飯，搵埋左丁山、老Ｔ、陸軍裝等到佢嘅飯堂「賀菊」食魚生、飲清酒，話題自不然離不開投資致富之道，陸軍裝一見老Ｔ，立即沙冧，猛話：「我抵死，一早賣晒。」老Ｔ大笑：「嗱，幾年前明益你，叫你買三八八，你賺唔到大錢，唔關我事。」陸軍裝話：「我係典型散戶，買中大快活、港交所，其士，賺咗三十巴仙就統統止賺，𠵱家見個市咁高，唔敢買㖭。」老Ｔ話：「散戶識蝕唔識賺，乃必然之理，你賣晒啲賺錢貨，手頭上仲係唔係揸住啲蝕本貨唔放呢？」陸軍裝唔敢答咯，低頭猛食「拖羅」。
講投資，老Ｔ兄老早賺到笑，可以上岸，投資Ｈ問佢：「仲係咁日日寫，仲係咁買股票，為乜呀，上岸休息吓啦。」老Ｔ話：「以我咁低嘅生活要求，七二年已經上岸，七四年蝕咗，跟住八○年又可以上岸，𠵱家更唔在講，賺錢已經唔係重要，重要嘅係證明我仍然有投資智慧。」
老Ｔ之言，令左丁山諗起大經濟學家熊彼得之言：「追求成功不是為了成功的果實，而是為了成功的本身。」所有大富豪今天仍然不斷工作，拚命賺錢，就係為了這一點。一般人搵到一億元，已有皇帝享受，無謂再捱。但世界上不分中外，大富豪仲係繼續打拼。
老Ｔ記得佢三十年前見過兩位富豪，其中一對夫妻檔已經先後過身。夫妻檔想請老Ｔ打工，老Ｔ中午時份上到佢地寫字樓，見到夫妻兩人喺度咬緊麵包當午餐，辦公室內一切簡陋，老Ｔ寒暄幾句，立即鬆人，因為佢覺得對自己都咁孤寒之大老闆，對夥計唔會好得去邊。另外有一次，佢去訪問地產元老Ｃ，又係在午飯時間。講到肚餓之時，元老Ｃ從櫃桶內拿出雞蛋三文治，畀一半老Ｔ，叫老Ｔ邊食邊訪問。一小時後，老Ｔ餓到要搵茶餐廳。老Ｔ講：「夫妻檔與元老Ｃ都有數之不盡嘅錢財，但生活上慳儉到極。佢哋搵錢嘅目的係乜？就係為搵錢而搵錢，證明自己有賺錢智慧。」老Ｔ都幾識得享受嘅，唔係元老Ｃ或夫妻檔，佢今日純粹係為投資而投資。