悠穎馳噚日同大家呻完新加坡的士難截，全因政府限制的士發牌，正面啲睇的確減低咗市區塞車同環保問題，之不過今日都要抦吓佢，事關香港政府正極力爭取嘅電子道路收費計劃，喺星洲卻成的士大佬理所當然嘅拒載藉口！
以最旺嘅烏節路（簡直係旺角銅鑼灣混合體）嚟計，夜晚揸車出入都要畀錢，撞啱有次悠穎馳喺文華酒店歎完Buffet，諗住殺落SunsetCity蒲Bar，點知企喺門口一粒鐘都上唔到的士，唔係冇車，而係全部的士司機都耍手擰頭，唔肯離開烏節路！因新加坡臨近半夜，幾乎淨得烏節路仲有人流，出咗去好難有客，「吉車」返嚟兜客已蝕一劑，仲要畀多次路費，不如搵番區內客好過！但奇在本地人已完全接受拒載，連文華專幫人截車嘅阿差都話冇計。
新加坡嘅的士大佬咁唔憂做，真係恨死香港班八折黨囉。他日香港真係推行電子道路收費，唔該諗得完善啲！
悠穎馳
豪邁不羈，愛車如命，聽幾下引擎聲就知咩車！