數碼達人：BenQ-Siemens分手之作？<br>輕金屬音樂利器

數碼達人：BenQ-Siemens分手之作？
輕金屬音樂利器

BenQ-Siemens呢個東、西合作品牌傳聞分手在即，據知BenQ仲話要獨戰江湖；呢部最新EF71可以話以十二成功力ShowQuali之作；鋁鎂合金外殼配免開蓋音樂操控面板，似音樂盒？論金屬質感簡直係KennyG支色士風嘅手機化身；試玩！音色、操控絕唔會俾SEWalkman比下去，以$2,080機價，簡直係手機音樂之利器！

記者：許福合　
攝影：楊錦文
ImageGirl：Zoe

音樂面板輕手玩

靚機有如一件靚衫，上手第一個印象來自觸碰質感；薄薄一層鋁鎂合金包裹，配襯直條子的金屬坑紋、四四方方冇天線，手執感覺就好似一件管弦樂器在手，機面再加一個黑鏡面Display同200萬像素鏡頭作間隔，色彩簡約、線條優美，賣相已經攞晒分。
對好多人嚟講，手機亦係一部MP3隨身聽；而EF71亦打正旗號，要成為一部音樂手機！最明顯特徵，當然係機面就見到嘅音樂播放鍵，輕按式設計，觸手順滑冇突兀；配上小小一個灰階OLED屏幕，除支援時鐘、來電及歌曲資料等多行顯示，刻意營造的微暗字粒，更輕輕滲出一種貴氣、HighTech嘅感覺，同大家玩開嘅日韓系機，真係完全唔同感覺！
音效方面，內置有6種不同音場變化，配合立體聲音效，音質不俗；喇叭設於機底，EF71平放時聲音會被擋住，想聽歌就要留意，好彩開大聲都無坼，兼夾幾細緻。另一留意點係FM收音並非內置，需要使用跟機FM收音連耳筒，感覺唔係幾方便。

■機身有炫金、粉紅同銀色選擇。

■想聽歌？輕輕篤一下即Play。

■機側有音樂功能快捷鍵，音量調校亦方便。

■要轉口味聽FM收音機，同好多大牌子手機一樣，都要靠個耳筒做天線，感覺較麻煩。

■播放介面對應十字方向同功能鍵，而且有音場選擇。

影相拍片WebCam三用

EF71表面具有金屬感，不過打開後膠感較重！但唔緊要，因為你都會被鍵盤上藍色冷光吸引住，配合黑色機身，反倒有種神秘嘅感覺。唔聽歌，想影張靚相，內置200萬像素鏡頭質素都令人滿意，有數碼變焦、多種場景及連拍模式，好動嘅亦可拍每秒30格連聲影片，當經USB接駁電腦後，更可以當埋WebCam用，一鏡三用，夠晒方便！
不過唔知係咪因為機身只有18.5mm，雖然支援MicroSD卡記憶，不過插槽竟然設於電池位，每次過相都要停機，都幾麻煩。最後要一提，EF71SIM卡插位可能會考起唔少人，依方向插入無難度，不過取卡就要有技巧，其實卡底設有底盤，將底盤拉出就可取回卡，只不過要將底盤推出，亦非容易！

■200萬像素鏡頭，美中不足係無自動對焦同閃光燈。

■藍色冷光鍵盤，開蓋就見到，效果好靚。

■機身設有MicroSD卡槽，但要拎起電池先見到。

■主題畫面都係玩音樂感，食晒手機主題。

機身Snapshot

■機身只有18.5mm，相當薄身！

■因為無自拍鏡，想自己拍番張靚相，就要估估吓。

■USB接駁同叉電都係使用相同插頭。

■圖像化介面，雖然無文字說明，不過都唔算難用。

■返工搭車等人？打場網球解悶先。

試影：光度不足

雖然喺室外拍攝，不過相片曝光明顯暗咗半級；整體色彩表現唔錯，尤以紅、綠等鮮色最突出，感覺鮮艷又討好；對焦亦算幾Sharp，以手機嚟講算係中規中矩。

Profile

制式：GSM900/1800/1900MHz
體積：90×47×18.5mm
重量：100g
屏幕：（內）2.2"TFT
（外）灰階OLED
通話時間：180分鐘
備用時間：225小時
主要功能：200萬像素鏡頭、MPEG4拍片、MP3、藍芽、MicroSD、SMS、MMS
查詢：BenQ（23306929）

■打開後，膠感較重，與機面金屬味不同。