港交所一直同鄰區交易所競賽，好多人都擔心港交所唔夠人跑，咁港交所一直有做嘢嘅，好似諮詢點樣改革創業板，都係想提高競爭力，跑得快過人，之不過，呢樣嘢講咗差唔多年半，但家吓都未有結論。
港交所主席夏佳理未出手，新加坡嘅新交所主席JYPillay已亦步亦趨，上個禮拜新交所公佈諮詢文件，話要改革主板同創業板Sesdaq，希望吸引更多具增長潛力嘅海內外企業去掛牌。
呢家嘢本嚟港交所一早話做，早喺李業廣做主席年代，已提出對創業板嘅市場定位及運作檢討，亦都做埋諮詢㖭，但一直冇乜進展，唔通正如夏主席之前講，香港要過好多關卡，所以慢過人？
取香港之所棄
根據新交所嘅建議，提出要提高主板新秀加入嘅門檻，即係擴大新股最低限度嘅規模，避免佢哋喺主板毫不起眼，又會推出一個「觀察名單」，將表現唔及大市嘅上市公司納入其中，最終可能要求對方除牌。
Sesdaq方面，建議仿效英國創業板AIM嘅做法，引入保薦人監督模式，由保薦人機構決定公司係咪適合喺新板上市，縮短上市申請時間，但呢啲新股嘅市值唔能夠超過1.5億坡紙。咁樣係為咗將兩個交易板嘅上市公司區分，吸引更多中型市值公司去主板掛牌。
呢次打到嚟，唔知港交所會點接招，不過，聽講港交所一早否決咗用英國AIM模式引入創業板，但唔知又有乜招數呢？夏主席睇嚟要加快啲腳步喇！
[email protected]