中銀香港一改以往作風，大幅增加董事會內執行董事嘅名額到3個，皆因佢哋啱啱公佈，5月25號委任財務總監李永鴻同副總裁高迎欣做執行董事，連同副董事長兼總裁和廣北在內，董事會內有3個執行董事。
自從中銀香港01年上市以嚟，執行董事數目未試過多過1名。為咗保障獨立股東嘅權益，𠵱家上市公司嘅董事會注重獨立非執董、非執董等人士，中銀香港反其道而行，背後嘅理念係點呢？
講番轉頭，李永鴻同高迎欣喺中銀香港嘅年資唔算長，李永鴻足足有三年、高迎欣就兩年多啲，佢兩位除咗每年可以多收20萬董事袍金之外，新嘅委任亦正式標誌佢哋可以進入權力核心。
順便講畀大家聽，李永鴻07年度嘅總現金報酬（包括基本薪金、房屋津貼同合約酬金）係567萬，高迎欣就有327萬，至於花紅有幾多，就真係要睇表現嘞！