中國無線（2369）在短短一個月內，股價由0.78元升上3.85元，升幅接近4倍，上周五收3.46元。
股價大升，當然有好消息，就係公司在今年首5個月的手機銷量大增兩倍，而預計1個月內，中國移動（941）又會正式成為其客戶，刺激增長。
中國無線股價已大升，今日主題唔係講佢，而係同樣有製造手機概念的通達集團（698），通達大半年冇郁過，大落後，但已「扯行油」，上周五已Start，隨時急衝。
通達唔會畀中國無線專美，一樣有好消息，就係公司嘅主打產品「模內鑲件注塑產品」（IMD），市場需求越來越大，產量又係以倍計上升。IMD技術較高，毛利率亦較高。
IMD可應用於家電產品、手機、電子數據產品、MP3及藍芽產品，04年產量係3200萬件、05年5200萬件、06年中有新廠房投產，產量升到8000萬件，已取得中國手機的大部份市場，07年新廠提供全年貢獻，產量更可倍增至1.5億件，令盈利再大幅上升。
基金揸重貨
公司盈利連續幾年都穩步上升，06年（12月年結），營業額11.18億元，升0.61%，主要係出售附屬公司通達五金；盈利1.61億元，升29.15%；每股盈利4.84仙。07年，由於IMD產量倍增，估計盈利可上升至2.6億元，升61.5%，每股盈利6.5仙（因年初配售新股攤薄），以PE15倍計，股價可見97.5仙。
中國無線往績PE64倍，就算07年盈利激增200%，每股盈利0.16元，預測PE都21.6倍，通達的15倍，仍算偏低。
通達係基金股，惠理持有9%，西京持5%，瑞信持4.2%，加上大股東揸53%，合共已71.2%，另外仲有毋須披露的基金持股，街外流通貨源相信只1成多（約幾億股），股市大時代，有概念、有好消息嘅股份唔會等好耐，隨時會爆升。