正當各大百貨公司舉行減價戰，將軍澳吉之島宣佈於6月30日結業，上周五開始舉行結業清貨大行動。原來師奶們早已在網上討論掃平貨攻略，減價第一日已吸引成千名師奶，大量家品低至四折，暫時屬第一階段減價，貨源尚很充足，想買平貨最好趁呢幾日，到最後階段就恐怕所剩無幾喇！
記者：郭佩韻
攝影：周旭文
Model：Wiyona
查詢：27032888
師奶上網密謀掃平貨
將軍澳吉之島已伴隨居民10年，其間為居民帶來日本、韓國、美國等購物節，已成區內師奶Shopping熱點，今次結業大批居民叫唔好，但結業日子已定，就算幾唔捨得，都只能以大割價回饋居民支持，所有貨品以低至四折出售。網上有唔少媽咪討論要買咩好，最多媽咪去BabyKingdomForum，個個都話要買廚具、家品及床上用品。不過今次超市沒有特別為結業清貨作特賣，最多是家品以低價出售，各位師奶們準備入貨了！
街訪掃乜嘢平貨？
黃小姐
夏天咁熱，一直都好想買蓆墊，呢度有八折，一於買呢個返去，大人細路都啱。
郭女士
今次減價都幾平，尤其係小朋友衣物鞋都好抵，買咗好多。
黃小姐
呢個廚具好平，呢個煲好抵，有半價，一定要買番個。
李女士
今次清貨都好平，我買咗兩件衫，每件$50，真係好抵！
5件必掃精選
LEXMARK彩色黑白打印機
原價$399
七折$280
慳$119
雅芳婷防霉抗菌珍珠枕（大人）
原價$179
五五折$99
慳$80
嬰兒透心涼蓆墊
原價$179
四折$69
慳$110
小童精選運動服
原價$129
四折$50
慳$79
Meyer美亞廚具SteelCirculon30cm單柄炒鍋連玻璃蓋
原價$999
半價$499
慳$500
買炒鍋即送廚具配件及食譜。
餐具四折起 兼有贈品
總括各師奶於網上所列清單，多是買小朋友用品、家具及家庭用品等，仲有打印機等，一於粗略跟住所買清單執平貨，睇睇可以慳幾多錢！首先睇嘅係Meyer美亞廚具，呢個品牌深受大班師奶歡迎，一知吉之島低至四折起出售，即時勁掃，美亞的銷售員話幾日內有某些款式已一掃而空，現有得番3款。
18cm2.8L單柄湯煲連玻璃蓋
原價$499
五五折$279.3
慳$219.7
24cm平底煎鍋
原價$439
五五折$244.3
慳$194.7
勁掃半價家品
家庭用品係師奶第二種必掃貨，精選必買品係枕頭，低至五折，且款式大人細路都有份，不妨考慮將全家枕頭換晒，有個新枕頭瞓，發個夢都會甜美好多。驚夏天太熱瞓得唔好，尤其係小朋友，好多時都要午睡，想慳電唔開冷氣，又怕熱親寶貝仔女，一於買張蓆墊鋪在地下或床上隔熱，仔女就唔會熱到出熱疹啦！
四折買名牌運動服
買完家品後，好想買件衫畀自己同仔女替換？有，今次有個四折運動服優惠，雖然揀貨環境比較雜亂多人，但只要畀少少耐性，一定搵到合你心水嘅衫款，師奶們可以去Wanko一欄掃平衫，部份二折就有交易，自己買完就同仔女去運動部揀，$50就有件童裝衫，一於唔好執輸揀番件先。
其他吸引折扣
跨區掃貨計落有着數
將軍澳雖然較偏遠，但有住在天水圍的網友媽咪都話要去睇吓有咩好嘢買，車費係貴少少，而且來回要成3小時車程，之但係今次擺明有平貨，又點可以錯過機會？其實只要識計數，出動埋仔女同老公，4個人車費雖然要成嚿水，不過睇準價錢買多幾件貨，慳番條數可以抵銷晒4個人嘅車費㗎！
天水圍及元朗區：可乘269B或268B巴士直達觀塘再轉乘地鐵往坑口站，車費$16.5+$6，每人合共$22.5。
屯門區：可乘259D巴士直達觀塘再轉乘地鐵往坑口，車費$14.5+$6，每人合共$20.5。
荃灣區：地鐵直達坑口，車費約$11。
銅鑼灣區：地鐵直達坑口，車費約$13。
以一個住天水圍的4人家庭為例
來回車費：爸爸及媽媽（$22.5+$22.5）×2=$90
一對12歲以下仔女車費（半價）
（$22.5/2+$22.5/2）×2=$45
合共：$135
買1個Meyer單柄炒鍋連玻璃蓋
慳$500
賺$365