近年新加坡喺第三任總理李顯龍帶領下，力谷旅遊業，又開賭場又搞超級摩天輪，務求喺2010前將全年旅遊人次由900萬突破一千萬！雄心萬丈係好事，對於我呢個一年飛幾次新加坡嘅人嚟講，多啲嘢玩梗好啦，之不過我覺得佢哋連最基本嘅交通都未搞掂！由於星洲對私家車諸多限制（除稅外仲要買擁車證），加上公共交通及道路頗為完善，國民已習慣唔揸車，大多依賴巴士同地鐵（MRT），但最大問題係的士；由於新加坡比香港還細，而且居住、消費地點唔多，幾乎去邊都只係十幾蚊坡紙（一嚿水港紙有找），個個「伸手截的」都毋須計過度過，最弊係的士數量少得可憐，政府又堅拒發牌，所以搞到由放工到晚飯消夜一段黃金時段，均出現的士真空情況，好多商場、酒店排晒等的士嘅人龍。當然你可以打上台Call的士，但就要加近$10港幣嘅附加費！本來都無乜所謂，不過此舉卻造成的士大佬寧願匿埋「等Call」嘅局面，令市區行走的士少上加少！
講開有道氣，聽日同大家呻埋新加坡電子道路收費嘅種種問題。
悠穎馳
豪邁不羈，愛車如命，聽幾下引擎聲就知咩車！