隨着個人理財服務近年需求殷切，財務策劃師成為就業市場「吃香一族」。喺美國，財務策劃師嘅平均年薪，拍得住哈佛大學MBA畢業生，而香港財務策劃師舊年嘅最高收入就超過100萬港元。
財務策劃師好似一個忠實嘅「管家」，同客戶處理投資、風險規避、稅務等問題。不過，有網友不滿財務策劃師收費過高。
LarienKoci喺《MSN討論區》大呻：「我有10萬美元（約78萬港元）身家，本來想請個財務策劃師幫我創造財富，不過，一個好嘅財務策劃師收費好貴，起碼要3000美元，相當於我副身家嘅3%有多，真係唔化算。所以我把心一橫，決定自己睇書或者上網搵理財資料，唔使聘請財務策劃師。」
斷鐘計 唔算貴
MilertheLarge話：「有啲所謂『財務策劃師』，其實只係保險公司或者證券行嘅營業員，佢哋經常推介嗰啲又貴又回報低嘅投資產品，所以投資者要提高警惕。」
RTResident教路：「各位聘請財務策劃師前，應查清楚對方嘅資歷同工作經驗。」
佢又講：「唔係個個財務策劃師都食水深，例如財務規劃機構GarrettPlanningNetwork嘅收費，就唔算好貴，佢哋旗下嘅認可財務策劃師（CFP）亦只係按小時收費，佢哋嘅服務仲備受好評。」
本身係CFP嘅fountainof話：「唔少人做生意好叻，但係就唔識處理好複雜嘅個人財務，於是花好多時間睇書，或者上網搵資料，但有關資料唔及財務策劃師嘅意見咁專業。計我話，個人財務策劃有如一個人終身嘅業務計劃，所以應該請財務策劃師同你未雨綢繆。」
花旗集團財務管理部行政總裁托德．湯姆森認為，未來幾年，財富管理業務會係全球銀行業最重要嘅增長領域之一。