噚日係股仔嘅天下，數到第30大升幅都超過26%，不過數一數交易所只得約40份關於股價或成交不尋常波動嘅公告，如果股價波動就要發公告澄清，點解得咁少異動通告？交易所嘅標準有時都幾難明白。
呢排股仔唔單止散戶鍾意玩，連大行同基金都對佢哋情有獨鍾，宏安（2925）繼雷曼入股後，又有Galaxy基金入股5.32%。另外黃河實業（318）獲荷銀睇中，斥資近4億港元向控股股東購入9.9%權益，入股價0.71元，將成為黃河實業最大的機構投資者。
呢單交易有兩點值得留意，第一係無發過新股，即係並非為咗配股集資，第二係唔涉及CB等嘅衍生工具，全舊股交易，即係又無攤薄效應。唔係為集資，呢間公司究竟有乜吸引之處？
黃河去年12月宣佈投資電子門票業務，與國新投資管理組成合營，分3期共投資5000萬美元。此電子門票系統已在北京酒吧街附近的什剎海歷史文化旅遊風景區試用，並計劃今年在國內共150個景點安裝。系統除咗可以識別假門票，並方便計算景點收益，算係食正明年奧運年，大行睇中應有佢嘅理由。
旭日環球成交異動
要搵細價股炒，除咗跟蹤大行之外，最重要係跟蹤成交，好似上周五中信21世紀（241）突然出現過百球咁大成交，即係有錢落場，實有嘢跟尾。噚日旭日環球（353）都出咗個成交異動通告，原來過去兩個交易日成交都逾百球。該公司除月前購入物流、投資管理業務外，去年底收購製銷人工晶體及其他眼部儀器之公司，既然有錢落場，可短炒一轉。