碧桂園眨吓眼已經喺香港上咗市個幾月，噚日主席楊國強嚟香港主持第一次股東會，佢形容自己好似「新新抱上花轎」，啱啱做上市公司主席，所以乜都唔敢講，怕講錯嘢被聯交所將軍。
佢淨係同華華講，上市後呢個幾月，已經喺瀋陽、湖南同廣東等地買咗900萬平方米土地儲備，𠵱家土儲總數增至2800萬平方米，但佢就唔肯講用咗幾多錢買，只係話同以前買開嘅價錢差唔多。對於內地加息嘅影響，佢都係例牌嗰幾句，話中央想樓市健康發展先加息，冇加重公司財政壓力……
至於從未喺香港露面嘅碧桂園真正大股東，即係楊主席位二千金楊惠妍，噚日亦冇蒲頭，主席話寶貝女生BB，唔想兩頭走。咁華華希望下次可以見到楊主席三代同堂啦。