人生有五味：甜、酸、苦、辣、鹹。有網民認為，人浮游於股海，見股價走勢升跌無常，高深莫測，賺得到固然係甜頭；見人哋隻股升，但自己嗰隻就郁都唔郁，真係好似打翻五味架──百般滋味在心頭。
甜：買咗一兩手股票，升咗幾毫子，就心花怒放，出門口望個天都藍啲，簡直可以話係「從晴朗嘅一天出發」。
睇人大賺心酸酸
酸：睇到人哋揸嘅股票升到嘭嘭聲，自己揸住嗰啲就原地踏步。心入面好唔抵得咁諗，「睇你得戚得幾耐，遲早輸死你！」
苦：揸住嘅股票坐艇坐咗好耐，股價稍為反彈，即刻斬纜止蝕離場；但隨後個股價大幅飆升，仲屢創新高。於是暈得一陣一陣，猛問：「點解我條命咁苦吖！」
高追轉跌激出火
辣：垃圾股山雞變鳳凰，股價一飛沖天。勢估唔到高位追貨後，走勢逆轉，股價一瀉千里。內心忍唔住痛罵：「衰貪心，明知危險都走去買，自己攞嚟。」
鹹：落場炒股，眼高手低。唔識股海嘅風高浪急，飲咗幾啖海水，先知到海水原來係鹹嘅。
http://www.somoney.com.cn/stock/13/35787.shtml