上市公司有基金入股通常係好消息。之不過，假如管理層搞唔掂盤生意，股價唔上唔落，就算幾腍善嘅芬佬都隨時長毛上身搞革命，搵人問責。
搞印多福食品及菲律賓長途電話（PLDT）嘅第一太平，回歸前係藍籌股，金融風暴之後大縮水。佢哋第二大機構投資者（佔股6.39%）、英資MarathonAssetManagement（馬拉松基金）始創人JeremyHosking噚日發公開信，吹雞叫小股東喺6月1日股東會上，投票叫行政總監彭澤仁（以前譯做彭澤倫，06年6月改咗𠵱家嘅譯法）執包袱。
個人揸住1000萬股嘅Hosking仲呼籲股東，千祈唔好贊成授權董事會發行20%新股，否則管理層又趁發新股做收購，攤薄小股東權益。又難怪Hosking咁驚，事關5月9日《彭博資訊》引述彭總話，一太正洽購值8至10億美元嘅亞洲電訊公司，又喺中國及區內洽購發電廠，咁雄心萬丈，Hosking唔腳軟有鬼？
林逢生力撐彭澤仁
Hosking嘅討伐信辣到飛起，話彭總長居CEO要職，但幾年嚟只專注搞併購，每次都以折讓價發新股畀錢，幫唔到公司提升價值。
佢好㷫話，已連續四年叫一太回購股份，但彭總都耍手擰頭。Hosking慨歎，一太96年股價喺12蚊，十年嚟升唔番仲跑輸恒指。佢度橋話，只要一太唔再收購，買番5%股份，實好穩陣上番10蚊。
一太大股東林紹良之子、03年接替主席嘅林逢生，即刻發信畀股東力撐老彭留低，話係最符合全體股東嘅利益。講到最令人心痛嘅股價，林總就辯護，公司過去五年升超過3.2倍，遠超恒指升75%嘅表現。
新購嘅印多福同PLDT舊年盈利可觀，林總話，一太雖則現金唔多，但增持PLDT6.4%股份嘅錢，都用咗4.2億美金長短債，暗示唔係吓吓靠配股。
[email protected]