內地股市「長升長有」，股民都賺唔少，不過咁，一日未袋落袋嘅錢，都唔係自己錢，所以喺一片泡沫之中，有啲醒目嘅內地股民，將部份資金折現，袋咗落袋先算。咁啲錢點用好呢？作為中國人，大家最基本願望都係有個五星級嘅家啫，所以話股市好，樓市亦受惠，於是，喺杭州就出現咗幾百人漏夜趕買樓嘅場面。
據內地網站報道，剛過去嘅禮拜日晚8點左右，好多人仲係食緊飯嘅時候，杭州市唔少人趕去城西一個樓盤前，擔埋凳仔搭晒帳幕霸位，皆因個樓盤第二日開售，有啲人禮拜六晏晝已經去排㖭。呢啲情景，香港曾幾何時都出現過，熟口熟面，後嚟樓市係點，大家都心照。內地股市嘅熱錢已經轉向樓市，咁內地股市嘅泡沫會唔會都跟住流入樓市呢？