滙控喺倫敦每年一度舉行嘅股東會，無論問嘅同埋答嘅，都不乏精采場面。首次主持股東會嘅葛霖，係人都知佢係聖公會牧師，台下發問嘅股東中，亦赫然出現一位牧師，問題梗係圍繞人權社會關心嘅嘢。嗰位牧師問葛霖，社會財富兩極化，係激化罪惡及暴力嘅源頭，獅子行高層同低下層員工，人工一個天一個地，主席有冇諗吓點改善呢個現象？
華人股東讚夢幻組合
睇嚟葛霖同嗰位牧師都有啲交情，仲話雙方其實已就有關話題交流多次，滙豐係一間商業機構，正係人在市場，冇辦法唔由市場主導，特別係俾外界成日鬧人工高嘅投資銀行部，葛霖話，如果唔用市價留住人才，獅子行就會失去競爭力云云。
股東會上亦有一位華人股東，秉承香港股東嘅慷慨作風，盛讚葛霖及紀勤這對新拍檔，話相信歷史可以證明，佢哋係有能力將滙控帶入新里程嘅「夢幻組合」，該名股東憶述，好似前任大班龐約翰上任時，人人都話佢冇可能叻過浦偉士，結果證明龐大班創造咗傳奇。
[email protected]