超精采！啱啱禮拜五嗰集《溏心風暴》，先有常在心爆大冷，成功幫莉姨力退大腳八；完場前又有大鮑忽然龍精虎猛，走返屋企「爆珠」，力攬4個仔女，對天發誓一毫子都唔分畀細契，睇到個人naturalhigh咗成晚。
結果嗰晚對住英格蘭B隊對阿爾巴尼亞場波，自自然然就好正面好有信心咁扑落個「主勝」。
第朝瞓唔夠6個鐘，好精神咁醒咗，狀態唔錯噃，跟手梗係趁住呢個頭腦清醒時刻，準備好呢份稿，同埋今日嘅推介。
性格球隊畢爾包，越來越接近自西甲成立以來，首次降落乙組比賽嘅結果，今晚主場鬥馬略卡，原本對手冇乜目標，畢爾包爭勝阻力有限；但咪畀我睇死，畢爾包呢場真係贏唔到！戰果應不離1:1及1:2兩瓣。
讓球主客和：馬略卡勝[+1]
心得：呢期hit「鮑」，唔係「包」！
華度
貼士嘅嘢，邊有實贏？睇相佬就話我有運行，冇點你！