格林斯潘果然有料到，講兩句國內嘅股市就有反應，跌咗落嚟，不過，祖國都有重量級人馬，全國社保基金頭頭項懷誠話𠵱家賣股票會俾人話你儍瓜，此語一出，國內股民又歡天喜地，A股同B股都抽番上去，咁係咪項老仲威過格老？
項老好權威咁話，股市就好似啤酒咁，有泡沫好正常，如果好似馬尿一樣，邊個要？事實係咪咁？啤酒有太多泡沫，飲起嚟嘅感覺唔多好，一般都會加多啲酒等啲泡沫散咗先飲，加多啲酒等如加多啲實質嘅嘢，少啲泡沫即係少啲虛浮嘅嘢，啲啤酒先會好味啲，股市都應該一樣。況且，啤酒泡沫多大都因為雪得唔夠凍，即係基本嘅飲用條件唔好，而唔係專登炮製多啲泡沫，如果酒吧畀啲多泡沫嘅啤酒畀人飲，你估間酒吧最後會點？安撫人心係好嘅，但係千祈唔好變成為已經好貪婪嘅人壯膽。
長實C輪4912：政府呢個禮拜賣地，地產股呢幾日跌咗咁多，應該會反彈，長實C輪4912可以諗吓。正股（001）上日收102.10元，反彈可上試105元，4912現價41仙，有效槓桿率13.6倍，正股升上105元，隻輪會見58仙，正股跌穿100.80元止蝕。