屋企冇「畸寶」嘅球迷，前晚雖則睇唔到碧咸喺西甲嘅精湛演出，但喺另一邊廂嘅「絲帶台」都欣賞到一場幾精采嘅德盃決賽。正如吾中賽前預測，紐倫堡搞掂腳仔軟嘅應屆德甲聯冠軍史特加，加時贏3:2，自1962年後首次捧盃。
史特加狂歡影響操練
呢場波都算峯迴路轉，幫史特加先開紀錄嘅卡卡奧，仲喺31分鐘被逐，搞到球隊處於劣勢。雖然佢哋喺法定時間唔輸打和2:2，但去到加時終於頂唔住，俾對手基斯廸安臣一球世界波搞掂輸2:3，雙料冠軍夢幻滅。
由於史特加喺德甲聯封王後連續狂歡咗3日3夜，所以賽後俾德國傳媒話呢個係佢哋輸波嘅主因；但佢哋教練華亞死撐，話如果11個打11個，結果將會唔同。點到好，我求大俠認為佢哋班球員去咗慶祝，上周四先回復操練，狀態肯定受到影響，所以紐倫堡捧盃都好合理。
聽講「絲帶台」嚟緊會播比利時、希臘同埋美國波，其中美職聯有碧咸睇，都幾有可觀性。𠵱家呢3個聯賽足智彩冇開盤，如果到時有得播，唔知會唔會開盤呢？